Durante as túas vacacións en Casa das Xacias, poderás ir de excursión ao Canón do Sil, a tan só 40 quilómetros de distancia, onde este río nos sorprende ao longo dos seus últimos 25 quilómetros con esa profunda garganta de roca tan espectacular antes de desembocar no Miño.

Para visitar o Canón do Sil desde Casa das Xacias, recomendámosche ir por Monforte de Lemos. Alí poderás visitar o Centro do Viño de Ribeira Sacra e descubrir a cultura do viño desta terra a través das súas xentes. O centro é tamén unha oficina de información turística.

Nestes canóns, do mesmo xeito que sucede no Miño, aproveitouse a abrupta orografía para a produción de enerxía hidráulica, o que fai que a auga do Sil descenda tranquila e sexa transitable para as embarcacións. Que mellor maneira de coñecer o Sil que a bordo dun catamarán ou doutras embarcacións que ofrecen experiencias personalizadas?

Se non che apetece navegar, outra forma de descubrir estes canóns é visitando os seus espectaculares miradoiros, situados en ambas as beiras. Os situados nas zonas máis elevadas permiten visualizar o encaixado percorrido do río, mosteiros, viñedos ou fervenzas. Un plan perfecto pode ser un picnic en familia á beira do miradoiro de Cadeiras, onde hai un santuario e unha área recreativa con mesas, grellas e espazo infantil. Tamén o miradoiro da Capela é estupendo para un picnic en parella ou con amigos: aquí poderedes desfrutar dunhas  vistas marabillosas. Unha experiencia inesquecible pode ser a posta de sol no miradoiro de Santiorxo ou o de Boqueiriño, desde o que poderás observar na beira de en fronte como nosa estrela se esconde  entre os castiñeiros do Mosteiro de Santa Cristina de Ribas de Sil.

Pero se o que che gusta é o deseño vangardista, recomendámosche visitar o miradoiro de Cividade, inaugurado en 2012 por encargo do Centro Galego de Arte Contemporánea tras unhas xornadas de intervención e mellora da paisaxe. Construído nunha  pendente case vertical con 30 metros de lonxitude en aceiro e piñeiro, é obra da arquitecta Isabel Aguirre.